Nama

Nyadi anak aku pagi tadi bisi enggau orang ngambi fire fighting course ba Sri Bima's. Iya siko aja indu enggau iya ke bukai laki magang,kira ke 15 iko sida,ko iya. Kebanyakan,munyi ko laut, bala ke training dia bala kitai Iban,ko iya. Sida iya tadi bisi roll call...nyadi bisi orang siko,maia nama iya di kangau,iya enda nyaut. Nyau berapa kali orang ke ngangau nama iya,lalu nadai di saut. "Tilam..Tilam..Tilam"..nadai ga nyaut. Udah nya nyau bala bukai nyaut," Nadai TILAM,AGI TINDOK! TILAM agi tindok.'ko sida nyaut. Ha..ha..Ninga bala chapuh,baru tudah sedar.
Kada ka betul nama tudah di kangau ka sida.Nyau ngagai cerita siti ga tu:
Ti kita kala berubat ba Dr. Cheu's Clinic,(semak kedai kopi 2020 tau ke seberai orang nyual sida buah semangka,nenas & macam agi buah dia) kita tentu kala sama nganti enggau bala kitai Iban ke medical check up,deka nurun ke tasik. Bala kompeni ke nganjong perkerja ke tasik selalu nguna Dr Cheu ngecheck sida. Aku suah ketawa ninga nama kitai Iban ke di kangau sida indu missi. Ti bala indu missi laut ngangau agi ulih di dinga,agi ulih di giga entelah,tang ti bala indu missi china ngangau ke nama nya iya bala kitai Iban ke nganti selalu tuchum ketawa ninga nama ke di sebut enda datai. ha..Ha..Chali chali nama ke di sebut sida,kadang kadang nama manah nyau nyadi enda manah ti di sebut sida. baka Dinin tau nyadi Tining..tining...Dindon tau nyadi Tintong...baka Tudan nyau nyadi Tutan. Bisi sekali kami dua Julia sama nganti Dr Noor meda blood test report kami duai. Benong nganti,kami duai macha report kediri empu..enda lama udah nya Julia madah ke aku,peda nuan tu,wai,ko iya nunjuk ngagai spelling nama apai iya ke di tulis missi china. Nama tudah apai aku Jugak nyau di tulis sida iya JUGAU,ko iya. Amat tuyu sida missi,ko iya. Ha..ha..kami duai bendar enkakah ketawa.